Choose Text 1; Choose Text 2; Return to Main Menu

De Temporibus Anticristi


Leofan men, us is mycel þearf þæt we wære beon þæs egeslican timan þe towerd is. Nu bið swyðe raðe antecristes tima, þæs ðe we wenan magan 7 eac georne witan, 7 þæt bið se egeslicesta þe æfre gewearð syððan þeos woruld ærost gescapen wæs. he byð sylf deofol 7 ðeah mennisc man geboren. Crist is soð god 7 soð mann, 7 antecrist bið soðlice deofol 7 mann. Ðurh crist com eallum middanearde help 7 frofer, 7 ðurh antecrist cymð se mæsta gryre 7 seo mæste earfoðnes þe æfre ær on worulde geworden wearð, 7 eall mancynn forwurde forðrihte gif god his dagas ne gescyrte. Ac god gescyrt his dagas for ðæra þingan þe him gecorene syn 7 he gehealdan habban wile. 7 ðeah on þam fæce þe he bið he gedeð swa mycel to yfele swa næfre ær ne gewearð. Ælcne mann he wile awendan of rihtan geleafan 7 of cristendome 7 bespannan to his unlarum gif he mæg, 7 god hit geþafað him sume hwile for twam þingum. An is ærest þæt men beoð þurh synna swa forð forworhte þæt hi beoð þæs wel wyrðe þæt deofol openlice þænne fandige hwa him fullfyligean wille. Oðer is þæt god wile þæt ða þe swa gesælige beoð þæt hi on rihtan geleafan ðurhwuniað 7 ðam deofle anrædlice wiðstandað, he wile þæt þa beon raðe amerede 7 geclænsode of synnum þurh ða myclan ehtnesse 7 ðurh þæne martirdom ðe hy þonne þoliað, forðam nis nan man þæt ne sy synful 7 ælc man sceal sar ðolian oðþon her oðþon elleshwær be ðam þe he þurh synna geearnað. 7 ðy bið seo ehtnes þonne godum mannum swa stið, forðam þe hy sculon beon raðe geclænsode 7 amerode ær se mycle dom cume. Ða ðe wæron forðferede for hund gearum oððon gyt firnor, wel þa magan beon nu geclænsode. We motan nyde þæt stiðre þolian, gyf we clæne beon sceolan þonne se dom cymð, nu we þæne fyrst nabbað þe þa hæfdon þe wiðforan us wæron. Beþence gehwa hine sylfne be ðam þe he wille, ne cymð ure æfre ænig to godes rice ær we beon æfre ælcere synne swa clæne amerede swa æfre ænig gold mæg clænost amerod weorðan.

Leofan men. God geþafað þam deofle antecriste þæt he mot ehtan godra manna, forðam þe hi sculon, swa ic ær cwæð, ðurh ða ehtnesse beon geclænsode 7 syððan clæne faran to heofona rice. þa þonne þe his leasungum gelyfað 7 him to gebugað, þam he byrhð her for worulde 7 ða he weorþað her, ac hy sculon raþe æfter ðam ecelice forweorðan 7 aa wunian syððan mid him on þære sweartan helle grunde. Se gesawenlica deofol wyrcð fela wundra 7 segð þæt he god sylfa beo, 7 mid his gedwimerum mæst ælcne man beswicð. 7 þa þe he elles beswican ne mæg, þa he wyle neadunga genydan, gyf he mæg, þæt hi godes ætsacan 7 him to gebugan. Gyf hi ðonne þæt nellað, þonne sculan he ehtnessa mycle 7 eac earmlicne deað geþolian. Eala, gesælig bið þeah se ðe to þam anræde bið þæt he forðam ne awacað, ac witodlice þæra bið ealles to lyt þe he ne beswice, oðþon þurh his searucræftas oðþon ðurh þæne gryre þe he on mancynn set.

Vre drihten crist gehælde fela þæra on life þe unhale wæron, 7 se deofol antecrist gebrocað 7 geuntrumað þa ðe ær hale wæron, 7 he nænne gehælan ne mæg buton he hine ærest awyrde. Ac syððan he þæne mann gebrocod hæfð, syðþan he mæg don swylce he hine gehæle, gyf he geswicð þæs þe he ær þam men to yfele dyde. He byð eal unwrenca full. Ðonne beswicð he swyðe fela manna þurh þæt, þæt he gebrocað mænige man dihlice 7 gehælð eft ætforan mannum þær hy on lociað, þonne geseoð hy hwæt he þonne deð 7 nytan na hwæt he ær dyde. Ælc yfel he mæg don 7 ælc he deð. He deð þæt fyr cymð ufene, swylce hit of heofonum cume, 7 he mid þam fela forbærnð, ealswa he hwilum ær iobes æhta dyde. Ac se ðe for þæs fyres ege him to gebihð, he sceal aa on helle on ecan bryne wunian. Ne can ic ne æfre ænig man oðrum asecgan fore ealne þone egsan þe ðurh þæne deofol on worulde geweorðan sceal. þonne age we mycle þearfe þæt we god ælmihtigne georne biddan þæt he us gescylde wið þæne egesan 7 us gestrangie swa his willa sy.

Se sylfa deofol þe on helle is, þæt is se þe þonne wyrð on þam earmsceapenan men antecriste 7 bið soðlice ægðer ge deofol ge man, 7 he eall mancyn þonne openlice swyðor gedrecð 7 gedwelað þonne hit æfre ær wurde. We agan þy swyðe mycle þearfe þæt we wið swylcne ege wære beon 7 eac þa warnian þe swylc nyton swylc towerd is. Forðam þe hit is nyr þam timan þonne ungelærede men gelyfan willan. 7 þæt is gesyne þy is ðeos woruld fram dæge to dæge wyrse 7 wyrse. Eac ic secge to soðe þæt deofol wyle ælces mannes geðanc, gyf he mæg, swyðe gelettan þæt he hit na ne understande, þeah hit him man secge, ne hine wið þæt ne warnige 7 ðurh þæt wyrð mæst manna beswicen þe hy ne beoð swa wære ne swa wel gewarnode ær swa hy beðorfton. La hwæt is se man on life buton hine god ælmihtig gehealde, 7 he ær gewarnod þe bet sy, þæt he þonne ðurh deofol beswicen ne wyrðe? Ac utan warnian us georne 7 geearnian to gode þæt he us gescylde swa his willa sy. Utan habban anrædne geleafan 7 fæstræde geþanc to urum drihtne. þonne þeah hit gebyrige þæt we þære yrmðe gebidan sculon 7 on þisum life earfoða adreogan, þeah gif we ne awaciað, ac þurhwuniað on rihtan geleafan, god us forsceawað ece reste. On godes naman ic bidde þæt cristenra manna gehwylc hine sylfne georne beþence 7 geornlice to gode gebuge 7 from synnum gecyrre 7 geearnige þæt he gemanian habban mote on heofona rice mid þam þe leofað 7 rixað a butan ende, amen.