Go to edited text; glossed text, translation; manuscript transcriptions: CCCC 201, CCCC 421

Hatton 113: Secundum Lucam


49b
Secundum Lucam
Erunt signa in sole & luna & stellis · & reliqua ·
Ðis godspel segð · 7 swutelað · þæt fela fortacna
sculon geweorðan wide on worulde · ægðer
ge on heofonlicum tunglum · ge on eorðlicum
styrungum ær ðam þe se dom cume · þe us
eallum wyrð gemæne ; · 7 witodlice ealswa
flod com · hwilum ær for synnum ; swa
cymð eac · for synnum · fyr ofer man cynn ;
7 ðær to hit nealæcð · nu swyðe georne · 7 ðy is
fela yfela 7 mistlicra gelimpa wide mid
mannum · 7 eal hit is for synnum · 7 gyt
50
weorþeð mare þæs ðe bec secgað · dracu · 7 ge
drecednes · þonne æfre ær wære ahwar on
worulde · þæt bið þonne antecrist wedeð
7 ealle woruld bregeð · 7 ðærto hit nealæcð
nu swyðe georne · 7 ðy hit is on worulde a swa
leng swa wyrse · þæs þe we sylfe · gecnawað
ful georne ; · 7 eac is on us sylfum swytol 7 ge
syne · þæt we to wace · hyrað urum drihtne ·
7 þæt we to orttreowe syndan godes mihta ·
7 his mildheortnessa · 7 þæt we him oftor
swyðor abelgað þonne we beþorftan ; 7eac
betweonan us sylfum · rihte getrywða healdað
to wace · for gode 7 for worulde ; 7 ðy us deriað ·
7 ðearle dyrfað · fela ungelimpa · 7 æl þeo
dige men 7 utan cumene · swyðe us swencað ;
ealswa crist on his godspelle swutollice sæde ;
þæt scolde geweorðan · He cwæð · Surg& gens
contra gentem · & reliqua · Ðæt is on englisc · Vpp
ræsað þeoda he cwæð · 7 wiðer ræde weorþað ·
7 hetelice winnað 7sacað heom betweonan ·
forðam unrihte · þe to wide wyrð mid mannum
on eorðan · Leofan men clæne wæs þeos eorðe
on hyre frumsceafte · ac we hi habbað syððan
50b
afylede swyðe · 7 mid urum synnum þearle
besmitene ; 7 ure misdæda eac · wregeað us
gelome · forðam þe we nellað godes lage
healdan swa swa gescoldan · ne gode gelæstan
þæt þæt we scoldan · Ne we teoðunga syllað
swa swa us gebyrede · ne we ælmessan dælað swa
swa we beðorftan · ac on æghwylce wisan waniað
to swyðe · eal þæt we sceoldan on godes est ge
læstan ; 7 forðy us eac swencað · 7 ongean
winnað manege gesceafta · ealswa hit awriten
is · Pugnabit pro deo orbis terrarum ; contra insen
satos homines · Ðæt is on englisc · Eal woruld
winneð swyðe for synnum · ongean þa ofer
hogan · þe gode nellað hyran · Seo heofone
us winð wið · þonne heo us sendeð styrnlice
stormas ; 7 orf 7 æceras swyðe amyrreð ·
Seo eorðe us winð wið · þonne heo for wyrneð
eorðlice wæstmas · 7 us unweoda to fela
asendeð · Eac hit awriten is · Ðæt sunne aþys
trað ær worulde ende 7 mona adeorcað ·
7 steorran hreosað · for manna synnum ·
7 ðæt bið þonne Antecrist wedeð ; þæt hit bið
gelic þam swylce hit swa sy · Hit is gecweden
51
þæt sunne aðystrað · þæt is þonne god nele
cyðan · on antecristes timan his mægen ne his
mihta swa swa he oft ær dyde · Ðonne bið gelic
þam swylce sunne sy aþystrad · 7 mona hit
cweð adeorcað · Ðæt is þæt godes halgan ænige
tacna þonne ne wyrcað swa swa hy oft ær
dydan · 7 steorran hit cweð hreosað ufene
of heofonum · Ðæt is þæt licceteras 7 leaslice
cristene · hrædlice hreosað · of rihtan geleafan ·
7 to antecriste geornlice bugað · 7 weorþað
his gefylstan · eallum heora mihtum · 7 ðonne
geweorþeð egsa se mæsta · þe æfre ær wære ;
7 ehtnes seo mæste · wide on worulde ·
Ne gebyrhð se gesibba þonne gesibban · þe ma
þe þam fremdan ; · 7 beðam egeslican timan ·
matheus se godspellere · soðlice þus cwæð ·
In diebus illis · erit tribulatio talis · qualis
non fuit abinitio mundi · nec postea erit ·
Ðæt is on englisc þæt swylce yrmð 7earfoðnes ·
bið þonne on worulde ; swylce æfre ær næs ;
ne eft ne geweorþeð · 7 raðe æfter þam ;
syððan astyred wyrð þurh godcunde
mihte ; eal heofonlic mægen ; 7 eorðwaru
51b
aræred · of deaðe to dome · Ðonne mæg
gecnawan · se þe ær nolde soðes gelyfan · þæt
crist þurh his mægen þrym · þonne geleanað
manna gehwylcum ærran gewyrhta · Wa þam
þonne þe ær geearnode helle wite · Ðær is
ece bryne grimme gemencged · 7 ðær is ece
gryre ; þær is granung · 7 wanung · 7 aa singal
heof · þær is ealra yrmða gehwylc · 7 ealra
deofla geþring · Wa þam þe þær sceal wunian
on wite · Betere him wære · þæt he man nære
æfre geworden þonne he gewurde · Forðam
nis se man on life · þe areccan mæge ealle þa
yrmða þe se gebidan sceal · se ðe on þa wita
ealles behreoseð · 7 hit is ealles þe wyrse ·
þe his ænig ende ne cymð · æfre to worulde ·
Eala leofan men utan don swa us þearf is ·
beorgan us georne wið þæne egesan · 7 helpan
ure sylfra þa hwile þe we magan 7 motan ·
þe læs we for weorðan þonne welæst wenan ·
Ac utan lufian god ofer ealle oðre þing ·
7 his wyllan wyrcan swa we geornost magan
þonne geleanað he hit us · swa us leofast
bið þonne we æfre þæs · betst beþurfan ·
52
him symle sy lof 7 wuldor in ealra woruld a
woruld a butan ende · Amen ·