Choose Text 1; Choose Text 2; Return to Main Menu

Hatton 113: De Temporibus Anticristi


52
DETEMPORIBUS ANTICRISTI
L
eofan men us is mycel
þearf þæt we wære beon · þæs egeslican timan
þe towerd is · Nu bið swyðe raðe ante cristes
tima þæs ðe we wenan magan · 7 eac georne
witan · 7 þæt bið se egeslicesta · þe æfre gewearð
syððan þeos woruld ærost gescapen wæs ·
he byð sylf deofol · 7ðeah mennisc man
geboren · Crist is soð god · 7 soð mann ; 7ante
crist bið soðlice deofol 7 mann · Ðurh crist
com eallum middan earde help · 7 frofer ·
7 ðurh antecrist se mæsta gryre · 7 seo mæsta
earfoðnes · þe æfre ær on worulde geworden
wearð · 7eall · mancynn forwurde forð
rihte ; gif god his dagas ne gescyrte · Ac god
gescyrt his dagas for ðæra þingan þe him
gecorene syn · 7 he gehealdan habban wile ·
7 ðeah on þam fæce þe he bið · he gedeð
swa mycel to yfele swa[n]æfre ær ne gewearð ·
Æ:lcne mann he wile awendan of rihtan
geleafan · 7 of cristendome · 7 bespannan
to his unlarum gif he mæg · 7 god hit geþafað
52b
him sume hwile ; for twam þingum · An is ærest
þæt men beoð þurh synna · swa forð for
worhte þæt hi beoð þæs wel wyrðe þæt deofol
openlice þænne fandige hwa him full ·
fyligean wille · Oðer is þæt godwile þæt ða þe
swa gesælige beoð · þæt hi on rihtan geleafan
ðurh wuniað · 7 ðam deofle anrædlice
wiðstandað ; he wile þæt þa beon raðe
amerede · 7 geclænsode of synnum · þurh[ða]
myclan ehtnesse · 7 ðurh þæne martirdom
ðe hy þonne þoliað · forðam nis nan man
þæt ne sy synful · 7 ælc man sceal sar ðolian
oðþon her · oðþon elles hwær be ðam þe he
þurh synna geearnað ; 7 ðy bið seo ehtnes
þonne godum mannum swa stið · forðam þe hy
sculon beon raðe geclænsode 7 amerode ·
ær se mycle dom cume · Ða ðe wæron forð
ferede for hund gearum · oððon gyt furðor ·
wel þa magan beon nu geclænsode · We motan
nyde þæt stiðre þolian · gyf we clæne beon
sceolan · þonne se dom cymð ; nu we þæne
fyrst nabbað · þe þa hæfdon þe wiðforan
us wæron · Beþence gehwa hine sylfne be ðam
53
þe he wille · ne cymð ure æfre ænig to godes
rice · ær we beon æfre ælcere synne swa
clæne amerede swa æfre ænig gold mæg
clænost amerod weorðan · L God geþafað
þam deofle antecriste þæt he mot ehtan
godra manna · forðam þe hi sculon swa ic ær cwæð
ðurh ða ehtnesse beon geclænsode · 7 syððan
clæne faran to heofona rice · þa þonne þe his
leasungum gelyfað · 7 him to gebugað · þam he
byrhð her for worulde 7 ða he weorþað her ;
ac hy sculon raþe æfter ðam ecelice for
weorðan · 7 aa wunian syððan midhim on þære
sweartan helle grunde · Se gesawenlica deofol
wyrcð fela wundra ; 7segð þæt he god sylfa beo ;
7 mid his gedwimerum mæst ælcne man
beswicð · 7 þa þe he elles beswican ne mæg ;
þa he wyle neadunga genydan gyf he mæg
þæt hi godes ætsacan ; 7 him to gebugan · Gyf hi
ðonne þæt nellað ; þonne sculan hi ehtnessa
mycle · 7eac earmlicne deað geðolian ·
Eala gesælig bið þeah se ðe to þam anræde
bið · þæt he forðam ne awacað ; ac witodlice
þæra bið ealles to lyt · þe he ne beswice ; oðþon
53b
þurh his searucræftas · oðþon ðurh þæne
gryre þe he on mancynn set · Vre drihten
crist · gehælde fela þæra on life · þe unhale
wæron ; 7 se deofol antecrist gebrocað 7ge
untrumað þa ðe ær hale wæron · 7 he nænne
gehælan ne mæg buton he hine ærest awyrde ·
Ac syððan he þæne mann gebrocod hæfð ·
syðþan he mæg don swylce he hine gehæle ;
gyf he geswicð þæs þehe ær þam men to yfele
dyde · He bið eal unwrenca full · Ðonne
beswicð he swyðe fela manna þurh þæt ; þæt
he gebrocað mænine man dihlice ; 7gehælð
eft æt foran mannum þær hy on lociað ;
þonne geseoð hy hwæt he þonne deð · 7 nytan
na hwæt he ær dyde · Æ:lc yfel he mæg don ·
7 ælc he deð · He deð þæt fyr cymð ufene · swylce
hit of heofonum cume · 7 he mid þam fela
forbærnð ealswa he hwilum ær iobes æhta
dyde · Ac se ðe for þæs fyres ege him to gebihð ·
he sceal aa on helle · on ecan bryne wunian ·
Ne can ic ne æfre ænig man oðrum asecgan
for eallum þam egsan þe ðurh þæne deofol
on worulde geweorðan sceal ; þonne age we
54
mycle þearfe · þæt we god ælmihtine georne
biddan þæt he us gescylde wið þæne egesan ·
7 us gestrangie swa his willa sy · 7 mycle ðearfe
agan þa þe þæs timan · gebidað þæt hi wære
beon · 7 þæt hi gemyndige beon þæra þinga
þe deofles menn oft ær þurh drycræft
drugon · Fela þinga dydan þa geogeleras on
egypta lande þurh drycræft · ongean þæt ðe
moyses þurh godes mihta þær fela wundra
worhte · 7swa we habbað be manegum geræd
ðe gehwar þurh drycræft · mid deofles
fultume · menn mis::lice dweledan · Betere
eac þæt we nu sum to bysne secgan · An deofles
man was hwilan on rome · simon hatte · se ge
swencte swyðe þearle twegen mære godes
ðegnas ; þæt wæs SanctuS PETRUS · 7 SanctuS PAULUS ·
hy bodedon on rome cristendom ærest ;
ac se deofles man hy gedrehte · 7 þæt folc
gelette wundorlice swiðe · He sæde þæt hit eal
leasung wære þæt ða godes þegnas bodedon ;
7 he worhte þurh drycræft fela wundra
ðær men to locedon · he dyde æt sumum sæle
þæt an æren nædre hy styrede · eal swylce
54b
heo cucu wære · 7 man hæfde geworht þa onðam
dagum on rome anlicnessa · 7 þæt hæþene folc
þurh deofles lare weorðe don þa heom
for godas ; þa he gemacode eac þurh dry
cræft · þæt hy agunnon swylce hy cwice wæron ·
Ðonne dyde petrus þurh godes mihta be
tere þing · Gehælde mistlice gebrocode men ·
Blinde · 7deafe · 7dumbe · 7 mistlice gelewede ;
And þa wearð hit cuð æt nyhstan þam casere
þe þa on þam dagum romware weold ; eal
hu hy hit macedon ; 7 mon herede him
ðearle swiðe þæne symon · Let on þa gedwo--
lan men ; swylce he se simon godes sylfes
sunu wære · 7 ða het æt nyhstan se casere
feccan þæne symon to him · 7 þa ða he him
to com 7 him ætforan stod · þa ablende he
þurh deofles cræft swa þæs caseres eagan ·
7 ðæra þe him mid wæron · þæt heom ðuhte
oðre hwile þa hy hine beheoldon þæt he
wære swylce hit cild wære þæt hy on locedon ;
oðre hwile eft swylce he medemre ylde
man wære ; 7 oðre hwile · swylce he eald
geðungen man wære ; 7 swa on mænige
55
wisan he hiwode þurh drycræft felaleas
bregda 7 þa þa se casere eal swylc geseah ;
þa wende he þæt hit godes agen bearn wære ;
7se deofles man gealp þæt he eac swa wære ·
7 þæt folc him to swyðe · þæs gelyfde · Ða
wunnan þa godan godes þegnas ongean þæt
swyðe ; 7 sædon þæt he luge ; 7 hy eac þurh
godes mihta mid manegum godum þingum
geswutelodon þæt hy riht hæfdon ; 7 þæt hit
eal leas wæs þæt se þeodloga sæde · Ða æt
nyhstan cwæð se simon · þæt he gecyðan wolde
þæt he gode wære · Het þa aræran ænne stepel ·
7 sæðe þæt he þyder upp stigan wolde · 7 englas
hine þær underfon scoldan · 7 to heofonum
ferian · 7 ðær eall þæt folc on locode he stah up
to ðam stepele · 7 of ðam stepele hof upp
on lyfte swylce he wolde wið þæs heofonas
weard · Ða clypode se casere · 7 cwæð þæt ða
swytol wære · þæt hit eal soð wæs þæt he ær sæde ;
7 þæt hit eal leasung wære · þæt petrus 7 paulus ·
þæt folc mid bregdan · Ða abædan hy
uneaðe þæt man geðyldgode sume hwile ·
oð man wiste to hwam se ende gehwurfe ·
55b
7 clypedon þa to gode swiðe georne · hwæt þa
sanctus petrus beseah raðe æfter þam up to þam
lyfte · 7 clypode hludre stefne · 7 ðus cwæð ·
Ic halsige eow deofles gastas · þe þæne deofles
mann gynd þa lyft feriað 7ðurh þæt menn
bepæcað · þæt ge þurh godes ælmihtiges bebod
hine nu ða forlætan · þæt he næfre leng
mid his mane menn ne beswice · Sona swa
he hit gecweden hæfde · þa forleton hy hine ·
7 he hreas nyðer · feoll þæt he eall tobærst ·
Ða wæs swytol godes miht · þeah he þæs deofles
gedwyld lange ær þafode · Eac we habbað
on bocum geræd þæt fela oðra deofles manna
wide wæran þe godes ðegnas oft þurh deofles
cræft swyðe geswencton · 7 folc swyðe gedweal--
don · ac hit þincð us to langsum nu to gerec
canne · Gemagan þeah be þissum anum
gecnawan · þa he ðurh deofol · swilcne cræft
hæfde ongean swylce godes þegnas · swylce
wæs sanctus petrus 7 sanctus paulus · æthweg hit bið
þonne se deofol [sylf] cymð þe ana cann eall þæt yfel ·
7 ealle þa drycræftas þe æfre ænig man
æfre geleornode · 7 eall he hit cyð þonne
56
openlice þurh hine sylfne · þæt he oft ær
dyde · þurh þa ungesæligan þe his larum fylig
don · Se sylfa deofol þe on helle is þæt is se
þe þonne wyrð on þam earm sceapenan men
antecriste · 7 bið soðlice ægðer ge deofol ge man ·
7 he eall mancyn þonne openlice swyðor
gedrecð 7gedwelað · þonne hit æfre ær wurde ·
We agan þy swyðe mycle þearfe · þæt we wið swylcne
ege wære beon · 7 eac þa warnian þe swylc nyton
swylc towerd is · Forðam þe hit is nyr þam
timan þonne ungelærede men gelyfan willan ·
7 þæt is gesyne þy is ðeos woruld · framdæge
to dæge wyrse 7 wyrse · Eac ic secge to soðe
þæt deofol wyle ælces mannes geðanc gyf
he mæg swyðe gelettan · þæt he hit na ne
understande · þeah hit him man secge ·
ne hine wið þæt ne warnige · 7 ðurh þæt wyrð
mæst manna beswicen · þe hy ne beoð swa
wære · ne swa wel gewarnode ær · swa hy be
ðorfton · La hwæt is se man on life buton
hine god ælmihtig gehealde · 7 he ær gewarnod
þe bet sy ; þæt he þonne ðurh deofol beswicen
ne wyrðe · Ac utan warnian us georne · 7 ge
56b
earnian to gode · þæt he us gescylde swa his
willa sy · Uton habban anrædne geleafan
7 fæstræde geþanc to urum drihtne · þonne
þeah hit gebyrige þæt we þære yrmðe
gebidan sculon · 7 on þisum life earfoða
adreogan ; þeah gif we ne awaciað · ac þurh
wuniað on rihtan geleafan · god us for scea
wað ece reste · On godes naman ic bidde ;
þæt cristenra manna gehwylc hine sylfne
georne beþence · 7 geornlice to gode gebuge
7 fram synnum gecyrre · 7 geearnige ·
þæt he gemanan habban mote on heofona
rice mid þam þe leofað · 7 rixað a butan
ende · amen ·