Go to edited text; glossed text, translation; manuscript transcriptions: CCCC 421, Hatton 113

CCCC 201: Secundum Lucam


72
Erunt signa in sole & luna & stellis · & reliqua · Þis godspel segð
7swutelað · þæt fela foretacna · sculan gewurðan wide ·
on worlde · ægðer ge on heofonlicum tunglum ge on eorðlicum
stirungum · ær ðam þe se dom cume · þe us eallum wurð gemæne · 7 witodlice
ealswa flod com hwilum ær for sinnum · swa cymð eac for sinnum
fir ofer mannum · 7 þarto hit nealæcð · nu swiðe georne · 7 þi is
fela ifela · 7 mistlicra gelimpa · wide mid mannum · 7eal hit is
for synnum · 7git wurðeð mare · þæs þe bec secgað · racu 7ge --
73
drecednes · þonne æfre ær wære · ahwar onworlde · þæt bið þonne
anti crist wedeð · 7 ealle world bregeð · 7 þarto hit nealæcð
nu swiðe georne · 7 þi hit is on worlde a swa lengc swa wyrse ·
þæs þe we silfe gecnawað ful georne · 7eac is on us silfum
swutol · 7 gesene · þæt we to wace hirað urum drihtene · 7 þæt we
to ortruwe syndon godes mihta · 7 his mildheortnesse ·
7 þæt we him oftor swiðe abelgað þonne we beþorftan · 7 eac be
tweonan us silfum · rihte getrywða healdað to wace · for gode
7 for worlde · 7 þi us deriað · 7 þearle dyrfað fela ungelimpa
7 ælþeodige men · 7 utan cumene swiðe us swæncað · ealswa crist
on his godspelle swutollice sæde · þæt scolde gewurðan he cwæð ·
Surget gentes contra gentem · et reliqua · þæt is on englisc · Up ræsað
þeoda he cwæð · 7 wiðerræde wurðað · 7 hetelice winnað · 7 sacað
heom betweonan · forðam unrihte þe to wide wyrð mid mannum
on eorðan · leofan men clæne wæs þeos eorðe · on hyre frum
sceafte · ac we hi habbað afilede swiðe · 7 mid urum sinnum
ðearle besmitene · 7 ure misdæda eac wregað us gelome ·
forðam þe we nellað godes lage healdan · swa swa we scoldon ·
ne gode gelæstan þæt þæt we scoldon · Ne we teoðunga ne sillað
swa swa us gebirede · ne we ælmessan ne dælað · swa swa we
beþorftan · ac on [ge]hwilce wisan waniað to swiðe · eal þæt we
scoldan on godes est gelæstan · 7 forðig us swæncað eac 7 on
gean winnað · manega gesceafta · ealswa hit awriten is ·
Pugnabit pro deo · orbis terrarum contra insensatos homines ·
þæt is on englis · eal world winneð · swiðe for synnum · ongean ða
oferhogan · þe gode nellað hiran · Seo heofone us winð wið
þonne heo us sændeð stirnlice stormas · 7 orf 7 æceras · swiðe
amirreð · Seo eorðe · us winð wið · þonne heo forwyrneð · eorð--
lices westmes · 7 us unweoda to fela asændeð · Eac hit
awriten is · þæt sunne aðystrað · ær worlde ende · 7 mona
adeorcað 7 steorran [h]reosað for manna sinnum · 7 þæt bið
þonne anti crist wedeð · þæt hit bið gelic þam swilce hit
swa sy · Hit is gecweden · þæt sunne aþystrað · þæt is þonne god
nele cyðan on anti cristes timan his mægen ne his
mihta · swa swa he oft ær dide · Ðonne bið gelic þam · swilce sy
aþystrod · 7 mona adeorcod · þæt is þæt godes halgan ænige
tacna þonne ne wyrcað · swa swa hig oft ær didon · 7 steorran
reosað ufon of heofonum · þæt is þæt liceteras · 7 leaslice
cristene · heardlice reosað · of rihtan geleafan · 7 to anti
criste geornlice bugað · 7 wurðað his gefilstan · eallum
heora mihtum · 7 þonne geweorðeð egsa se mæsta · þe æfre ær wære ·
74
7 ehtnes seo mæste wide on worlde · Ne bir[h]ð þe [ge]sibba þam gesibban · þe ma
þe þam fremdan · 7 be þam egeslican timan · matheus se godspellere
soðlice þus cwæð · In diebus illis · erit tribulatio talis · qualis non
fuit ab initio mundi · nec postea erit · þæt is on englisc · þæt swilce yrmð
7 earfoðnes bið þonne on worlde · swilce æfre ær næs · ne eft ne ge
wurðeð · 7 raðe æfter þam siððan astired wurð · þurh godcunde mihte
eal heofonlic mægn · 7 eorðwaru aræred · of deaðe to dome · þonne
mæg gecnawan se þe ær nolde soðes gelifan · þæt crist þurh his
mægenþrym · þonne geleanað manna gehwylcum ærran gewirhta ·
Wa ðam þonne þe ær geearnode helle wite · þar is ece bryne grimme
gemæncged · 7 þar is ece grire · 7 þar is granung 7 wanung · 7 aa
singal heof · ðar is ealra yrmða gehwilc · 7 ealra deofla geþryngc ·
wa þam þe þar sceal wunian on wite · betere him wære þæt he man nære ·
æfre geworden · þonne he gewurde · forðam nis se man on life · þe areccan
mæge ealle þa yrmða · þe se gebidan sceal se þe on ða wita ealles
bereoseð · And hit is ealles þe wyrse þe his næfre nan ende
ne cymð æfre to worlde · Eala leofan men · utan don swa us þearf is ·
beorgan us georne wið ðone egsan · 7 helpan ure silfra · þa hwile
þe we magan 7 motan · þi læs we forwurðan þonne we læst wenan ·
Ac uton lufian god ofer ealle oðre þingc · 7 his willan wyrcan
swa we geornost magon · þonne geleanað he hit us swa us leofost bið ·
þonne we æfre þæs betst beþurfan · him sy lof 7 wuldor in ealra
worlda world a butan ende · amen ·