Oxford, Bodleian Manuscript Junius 121


Ker 338, Gneuss 644. An 11th century manuscript measuring 11 1/10 X 6 1/2 inches, written in Old English and Latin. It contains canons, penitentials, a confessional, two of Ælfric's Pastoral Letters and several of his homilies, and Wulfstan's Institutes of Polity, as well as his homilies De Anticristo (Bethurum Ib), De Regula Canonicorum (Bethurum Xa), and Be Godcundre Warnung (Bethurum XIX). It is connected with Worcester both by the scribe Wulfgeat's signature (folio 101) and by a copy of the Nicene Creed in the tremulous Worcester hand (folio vi).


136b
DE ANTICRISTO
Leofan men understandað swyðe georne
þæt ge rihtlice 7 wærlice þæt healdon · þæt eow mæst
þearf is to gehealdenne · þæt is rihtne cristendom ·
Forðam ælc þæra þe ongean þæt to swyðe deð ·
oðþon oðerne ongean þæt læreð þe his cristen
dome to gebyreð · ælc þæra bið antecrist
genamod · Anticristus is on leden · Contra
rius cristo · þæt is on englisc · godes wiðersaca ·
Se bið godes wiðersaca · þe godes lage 7 lare
forlæt : 7 ðurh deofles lare of ðam deð
þe his cristendome to gebyreð · 7 on synnum
hine sylfne to swyðe befyleð · oðþon
oðerne man on synna belædað · 7 ðeah
þæt sy · þæt fela manna antecrist sylfne
137
næfre his eagan ne geseo · to fela is þeah
his lima : þe man wide mæg nu geseon · 7 ðurh
heora yfel : gecnawan mæg · Ealswa hit on þam
godspelle geræd is · Surgent enim pseudo cristi ·
& reliqua · Wide hit gewyrð þæt up arisað lease
leogeras · 7 beoð swæslice swicole · 7 ða
mænine man amyrrað · 7 on gedwylde
gebringað · 7 swa mycel earfoðnes gewyrð
on mænige wisan gyt wide on worulde ·
þæs þe bec secgað · þurh deofles bearn · þe
unriht dreogað · swa næfre ær on worulde
ne gewearð ; forðam þæt mæste yfel cymð
to mannum [:] þonne antecrist sylf cymð ·
þe næfre ær on worulde ne gewearð · 7 us
þincð þæt hit sy þam timan swyðe gehende ·
forðam þe þeos woruld is fram dæge
to dæge [:] a swa leng swa wyrse · Nu is mycel
neod eac eallum godes bydelum · þæt hi godes
folc warnian gelome · wið þone egsan
þe mannum is towerd · þe læs þe hy unwære
wurðan aredode ; 7 ðonne to hrædlice
þurh deofol beswicene · Ac do sacerda
137b
gehwylc on his scriftscire · þæt hit man ge
hyre oft 7 gelome · þe læs þe hit geweorðe
þæt ðurh larleaste godes folc losie · 7 ðeah
þæt geweorðe þæt ure ænig þe nu leofað þonne
ne libbe · þeah we agan þearfe · þæt we godcunde
heorda warnian nu georne · hu hy þam deofle
antecriste sylfan : wærlicast magan þonne
wiðstandan · þonne he his wodscinn wid
dast tobredeð · 7 utan warnian us eac swa
wið his unlara nu swyðe georne · 7 god
æl mihtine georne biddan · þæt he us gescylde
wið þæne þeodscaðan · God us gescylde
wið þone egsan · 7 he us geryme to ðære
ecan myrhðe · þe þam is gegearwod · þe his
wyllan gewyrcað · Ðær is ece bliss 7 æfre
bið in ealra worulda woruld a butan
ende · amen ·